Tarifat doganore, mbrojtje ndaj prodhimit vendas

Në komisionin e integrimit është diskutuar mes përfaqësuesve të qeverisë dhe deputetëve të opozitës se tarifat doganore të parashikuara në paketën fiskale duhet që të mbrojnë prodhimin vendas.
Megjithatë, efekti total në buxhet si rrjedhojë e ndryshimeve të nivelit të tarifës doganore në vijim të respektimit të angazhimeve të OBT-së dhe MTL-ve për vitin 2006 do të jetë një rënie e të ardhurave nga taksa doganore me rreth 713,9 milionë lekë. Në paketën fiskale përfshihen angazhimet e OBT-së sipas notifikimit të bërë së fundi dhe të miratuar nga OBT-ja, në të cilën është riformuluar skeduli duke e harmonizuar me ritmet e rritjes ekonomike të prodhimit brenda vendit si dhe forcimin e fushave ekonomike në të cilat është investuar nga biznesi. Gjithashtu, është konsoliduar dhe rritja e eksportit për prodhimet e vendit drejt vendeve të rajonit me të cilat zbatohen marrëveshjet e tregtisë së lirë. Të ndara sipas grupeve mallrat që përfitojnë reduktim sipas skedulit të vitit 2006 janë: pijet alkoolike, artikujt kozmetikë, preparate për trajtimin e lekurës, sapun dhe lustrues etj. Taksa doganore është një nga taksat me një performancë të lartë administrimi në krahasim me vendet e tjera, duke marrë parasysh jo vetëm nivelin e mbledhjes së saj në përqindje të PBB-së, por edhe nivelin shumë të ulët të tarifës së saj mesatare vjetore. Që prej vitit 1999 kur Shqipëria aderoi me të drejta të plota në Organizatën Botërore të Tregtisë, politika e ndjekur ka qenë për një politikë në uljen e tarifës së taksës doganore, nga viti në vit, duke reflektuar jo vetem detyrimet e OBT-së, por edhe respektimin e marrëveshjeve të tregtisë së lirë me pothuajse të gjitha vendet e rajonit. Po t’i referohemi peshës që zë kjo taksë në përqindje të PBB-së, vendi ynë është në nivelin e 1,6 % të PBB-së (viti 2005), ndërkohë që vende të tjera të rajonit si Kroacia, Rumania, Bullgaria, Sllovenia etj., janë shumë më poshtë këtij niveli. Nëse do t’u referoheshim vlerave nominale të të ardhurave të mbledhura nga kjo taksë, përformanca është në rritje nga viti në vit.

Autori i Lajmit: Dh.Alimani