Qeveria humbet nga tatimet 44 miliardë lekë

Qeveria parashikon realizimin e mbledhjes së ë të ardhurave nga administrata tatimore në masën 94 për qind. Ky parashikim shkon deri në fund të këtij viti dhe siç cilësohet në projektbuxhetin e vitit 2006, mosrealizimi që mbetet kap shifrën e rreth 4.4 miliardë lekëve. Për ecurinë më të mirë të programit të mbledhjes së të ardhurave nga administrata tatimore, qeveria do të ndërmarrë një program reformimi të kësaj administrate, program për më shumë eficensë në punën e saj. Gjithashtu, pritet të ndërhyhet në ligj për të arritur procedura më të thjeshtësuara për pagesat dhe për dokumentet që nevojiten për këto pagesa, duke reduktuar mundësinë e abuzimeve në këtë sektor.
Të ardhurat e tjera
Për tatimin mbi vlerën e shtuar, realizimi i pritshëm në fund të vitit 2005 mund të arrijë në rreth 82.3 për qind të programit vjetor. Rimbursimet për TVSH-në pritet të jenë në rreth 1.8 miliardë lekë, nga të cilat 1.1 miliardë u përkasin detyrimeve të prapambetura dhe 0.7 miliardë lekë detyrimeve korente. Detyrat që vendos projektbuxheti për deri në fund të vitit për TVSH-në, lidhen me rritjen e numrit të tatimpaguesve për skemën e TVSH-së. Tatimet do të kenë si detyrë të reduktojnë numrin e tatimpaguesve që nuk deklarojnë ose deklarojnë me ndërprerje në masën 11 për qind në raport me numrin e përgjithshëm të tatimpaguesve të TVSH-së, ushtrimin e kontrollit sistematik për të gjithë bizneset që janë në TVSH dhe deklarojnë të ardhura nën 8 milionë lekë.
Tatimi me fitimin
Në zërin e tatimit mbi fitimin, megjithë efektin negativ të uljes së shkallës tatimore me 2 pikë përqindjeje (nga 25 për qind në 23 për qind), të ardhurat pritet të kenë një performancë në rritje, me mbi 2.6 miliardë lekë më shumë se plani vjetor. Në zërin e akcizës pritet që plani i të ardhurave të realizohet në rreth 89.5 për qind, ose me një deficit prej rreth 902 milionë lekësh kryesisht nga sektori i prodhimit të naftës dhe cigareve.

Autori i Lajmit: Juli Prifti