HISTORIKU I QYTETIT TE TIRANES

- “Tiranë” mendohet se vjen nga fjala “Theranda”, e përmendur në burimet e lashta greke dhe latine, që vendasit e quanin Te Ranat, meqë fusha ishte formuar si rezultat i materialeve të ngurta që sillnin ujrat nga malet përreth.
2- “Tirana” vjen nga “Tirkan”. Tirkan ka qenë një kështjellë në shpat të Malit të Dajtit. Edhe sot e kësaj dite ekzistojnë rrënojat e kësaj kështjelle të lashtë që daton në fillimin e shekullit I para Krishtit. Kjo mendohet të ketë qenë kështjella që historiani bizantin Prokop, (shek.VI), e quan Kështjella e Tirkanit.
3- “Tirana” vjen nga greqishtja e vjetër, “Tyros” që do të thotë bulmet. Mendohet se ky variant ka mbetur ngaqë në fushën e Tiranës bëhej tregtimi i bulmetrave nga barinjtë e zonave përreth.
Për herë të parë emri i Tiranës në formën e sotme përmendet në vitin 1418 në një dokument të Venedikut.
Për herë të parë regjistrimi i tokave u bë nën pushtimin otoman në vitet 1431-1432. Tirana kishte 60 qendra të banuara me rreth 1000 shtëpi dhe 7300 banorë.
Në shekullin XV njihen, siç përmendet nga Marin Barleti, Tirana e Madhe dhe Tirana e Vogël.
Në regjistrimet e vitit 1583 treva e Tiranës rezulton me 110 qendra të banuara, 2900 shtëpi dhe 20, 000 banorë.
Tirana u themelua në 1614 nga Sulejman Pasha, i cili ishte me origjinë nga fshati Mullet. Fillimisht ai ndërtoi një xhami, një furre dhe një hamam.
Dy shekuj me vonë drejtimin e qytetit e mori familja Toptani nga Kruja. Dy lagjet më të vjetra të Tiranës kanë qenë ajo e Mujos dhe e Pazarit, të ndodhura sot në zonën mes qëndrës aktuale dhe Rrugës së Elbasanit, në të dy anët e Lanës.
Në vitin 1703, Tirana kishte 4000 banorë.
Në vitin 1769 treva e Tiranës eksportonte në tregjet e Venedikut 2600 fuçi me vaj ulliri dhe 14.000 dengje duhani.
Në vitin 1820, Tirana kishte 12.000 banorë.
Në vitin 1901, Tirana kishte 15.000 banorë.
Në fillim të shekullit XX, Tirana kishte 140.000 rrënjë ulliri, 400 mullinj vaji, ndësa pazari i saj numëronte 700 dyqane.
Në vitin 1838, Tirana kishte 38.000 banorë.
Në vitin 1945 kishte 60.000 banorë. Xhamia në qendër të Tiranës, e quajtur Xhamia e Et'hem Beut, filloi të ndërtohej më 1789 nga Molla Beu, i ardhur nga Petrela. Xhamia u përfundua më 1821 nga i biri i Molla Beut, Haxhi Et'hem Beu, stërnipi i Sulejman Pashës. Për të punuan mjeshtrit më të mirë të Shqipërisë. Kulla e Sahatit u fillua nga Haxhi Et'hem Beu rreth vitit 1821-1822 dhe u përfundua me ndihmat e familjeve të pasura të Tiranës. Montimi i sahatit u bë nga familja Tufina. Më 1928 u ble në Gjermani nga shteti shqiptar një sahat modern dhe kulla u ngrit në lartësine 35 metra. Gjatë Luftës së Dytë Botërore, Sahati u dëmtua, por u rivu në punë në korrik të vitit 1946.
Kisha Ortodokse e Shën Prokopit u ndërtua në vitin 1780.
Kisha Katolike e Shën Mërisë u ndërtua në vitin 1865 me shpenzimet e Perandorit austro-hungarez Franz Jozef. Ura e Tabakëve dhe Ura e Terzive, (aktualisht ura e Rrugës së Elbasanit), datojnë në fillim të shekullit XIX. Tyrbja e Kapllan Pashës, (pranë monumentit “Ushtari i Panjohur”), është ndërtuar në vitin 1816.
Bibloteka u themelua në vitin 1922 dhe kishte 5000 vëllime.
Kalaja e Petrelës ndodhet 12 km nga Tirana dhe daton në shekullin IV, para Krishtit. Formën e saj aktuale e mori në shekullin e XIII nën sundimin e Topiajve dhe më vonë kaloi pronë e familjes së Kastriotëve.
Tirana u shpall kryeqytet i përkohshëm më 8 shkurt 1920 nga Kongresi i Lushnjes dhe përfundimisht e mori këtë status më 31 dhjetor 1925.
Tirana është kryeqendra botërore e bektashinjve nga viti 1925, vit kur bektashinjtë u ndaluan dhe përzunë nga Turqia.
Plani i parë rregullues i qytetit u hartua në vitin 1923 nga Estref Frashëri. Rruga e Durrësit është hapur më 1922 dhe quhej rruga “Nana Mbretneshë”. Për ndërtimin e saj u prishën shumë shtëpi e kopshte. Godina ekzistuese e Parlamentit u ngrit më 1924 dhe fillimisht ka shërbyer si Klubi i Oficerëve. Atje, më 1 shtator 1928, Ahmet Zogu shpalli monarkinë.


Qendra e Tiranës është projektuar nga arkitektët e njohur italianë të periudhës musoliniane Florestano de Fausto dhe Armando Brasini.
Pallati i Brigadave (ish-Pallati Mbretëror), godinat e Ministrive, Banka Kombëtare dhe Bashkia janë vepra të tyre.
Bulevardi “Dëshmorët e Kombit” është ndërtuar në vitin 1930 me emrin Bulevardi Zogu I. Në periudhën e komunizmit pjesa nga Sheshi “Skënderbej” deri te Stacioni i Trenit u quajt Bulevardi “Stalin”.
Pallati i Kulturës, ku ndodhet Teatri i Operas dhe Baletit dhe Bibloteka Kombëtare, u përfundua më 1963. Ai u ndërtua mbi ish-Pazarin e Vjetër të Tiranës dhe tulla e parë u vendos nga ish-presidenti sovjetik Nikita Hrushov më 1959.
Monumenti i Skënderbeut, i ngritur më 1968, është vepër e Odhise Paskalit, në bashkëpunim me Andrea Manon dhe Janaq Paçon. Ai u vendos me rastin e 500-vjetorit të vdekjes së heroit tonë kombëtar.
Monumenti “Nënë Shqipëri”, 12 metra i lartë, u përurua në varrezat e “Dëshmorëve të Kombit” më 1971.
Akademia e Shkencave u përfundua më prill 1972.
Galeria e Arteve Figurative u krijua më 1976 dhe në të përfshihen rreth 3200 vepra të autorëve shqiptarë dhe të huaj.
Muzeu Historik Kombëtar u ndërtua më 1981 dhe afresku në pjesën ballore të tij titullohet “Shqipëria”.
Qendra Ndërkombëtare e Kulturës, ish-muzeu “Enver Hoxha”, u përurua më 1988. “Piramida” u projektua nga një grup arkitektësh nën drejtimin e Pranvera Hoxhës dhe Klement Kolanecit.
Në vitin 1990 Tirana kishte 250.000 banorë. Aktualisht, dyndja masive e banorëve nga gjithë pjesët e tjera të vendit drejt kryeqytetit, e ka çuar popullsinë e Tiranës në mbi 700.000 banorë.
Në vitin 2000 qendra e Tiranës, nga Korpusi Qendror i Universitetit dhe deri te Sheshi “Skënderbej”, u shpall Ansambël Kulturor me vlera të veçanta dhe mbrohet nga shteti. Po atë vit, në këtë zonë filloi një proces restaurimi i quajtur “Kthim në Identitet”


Të dhëna arkeologjike
Mozaiku i Tiranës është i vetmi monument arkeologjik brenda territorit të qytetit të Tiranës. Në vitin 1972, gjatë punës për ndërtimin e pallateve të bllokut “Partizani” në lagjen nr. 9 të qytetit të Tiranës, u zbuluan rrënojat e një ndërtese antike, njëri nga ambientet e të cilit ishte i shtruar me mozaik. Sipas autorëve, kemi të bëjmë me një qendër fshatare të shekujve të parë pas Krishtit që në fillim të shek. III u zëvendësua me një vilë fshatare (rustica). Salla me mozaik e pajisur dhe me një absidë ishte ambjenti kryesor i saj. Autorët mendojnë edhe që në shek. V-VI vendin e vilës e zuri një bazilikë paleokristiane. Pjesa e gërmuar e monumentit u rrethua dhe u vu në mbrojtje nga Instituti i Monumenteve të Kulturës (IMK). Gjatë viteve 2003-2004 punimet e sistemimit të rrugëve dhe instalimeve të ndryshme të bllokut “Partizani” zbuluan pranë rrethimit të monumentit pjesë të tjera të kompleksit. Më kryesoret këtu ishin vaskat e fermentimit të mushtit të rrushit, por edhe pjesë të tjera muresh në dy pika të ndryshme. Brenda këtij kompleksi u zbuluan tre stela varresh të periudhës romake. Gërmimet e fundit përforcuan mendimin se kemi të bëjmë me një vilë fshatare, ndërkohë që nuk është gjetur asnjë e dhënë për transformimin në bazilikë paleokristiane të mbështetur nga autorët e gërmimit të parë të viteve ’70. Në mënyrë konvencionale, siti arkeologjik është emërtuar dhe njihet me emrin “Mozaiku i Tiranës”.

Statistika

Tirana shtrihet midis Malit të Dajtit në Lindje, kodrave të Krrabës dhe Saukut në Jug, kodrave të Vaqarrit dhe Yzberishtit në Perëndim dhe atyre të Kamzës në Veri.
Tirana ndodhet 110 m mbi nivelin e detit.
Temperatura mesatare vjetore është 17°C.
Sasia mesatare vjetore e rreshjeve është 1,297 mm.
Sipërfaqja e qytetit të Tiranës është 31 km2.
Sipas Zyrës së Gjendjes Civile në Bashkinë e Tiranës, numri i banorëve deri në Dhjetor 2004 arrin në rreth 552,016, nga të cilët 49.8% janë meshkuj dhe 50.2% janë femra.
Krahasuar me vitin 2003 do të vinim re një rritje të popullsisë me 7%, numrit të familjeve me 7% si dhe një zvogëlim të numrit të lindjeve me 9%, numrit të vdekjeve me 18% si dhe numrit të martesave me 8%.

Arsimi
Gjendja aktuale e institucioneve arsimore për vitin shkollor 2003-2004 është si më poshtë vijon:

29 çerdhe
68 kopshte (43 publike dhe 25 private)
104 shkolla 8-vjeçare (57 publike dhe 47 private)
39 shkolla të mesme (21 publike dhe 18 private)
8 universitete ( 6 publike dhe 2 private)


Kultura dhe sporti
Ndër projektet kulturore të zhvilluara nga Drejtoria e Kulturës Rinisë dhe Sporteve gjatë vitit 2004 përmendim:

Bienalja e tretë e Mesdheut Premiera e filmit "Dear Enemy"
Rinfest 2004 Festivali IV Shopenian
Dita Ndërkombëtare e Nënës dhe e Familjes Dita e muzikës së re
Nuk dua, nuk më pëlqen Moda Italiane në Shqipëri
Takim mbarëkombëtar i Brezave pianistë Këngët e Tokës
Bashkëpunim në fushën e instrumentave të harqeve Peza Fest 2004
Mikrofoni i artë Me tinguj nëpër vende
Mbrëmje poetike Festivali operistik "Marie Kraja"
Vjeshta e Tiranës Panairi i librit 2004
Ekspozita "Burgjet gjatë regjimit komunist 1945-1991" Gazeta rinore Foris
Festivali II Europian i Këngës për Fëmijë Konkursi Fjala 2004
Onufri 2004 Magjia Nadir
Festa e Madhe e Vitit të Ri 2004

Disa nga projektet sportive janë:

Përtëritja e traditës së qitjes sport me të rinjtë e kryeqytetit
Për një Tiranë të pastër, të bukur dhe aktive
Pastrimi i Liqenit artificial të Tiranës
Festivali i vrapimit "Let's run together"
Pjesëmarrje në ditën sportive të solidaritetit miqësor në qytetin e Peshkopisë
Ndeshja e zemrave
Kampionati i bilardos

Në Tiranë zhvillojnë aktivitete kulturore një sërë institucionesh si: Teatri i Operas dhe Baletit, Teatri Kombëtar, Ansambli Shtetëror, Estrada, Cirku, Teatri i Kukullave, Kinema Millenium 1 dhe 2.

Për vitin 2004, aktiviteti i institucioneve kulturore është si më poshtë:

Teatri i Operas dhe Baletit ka vënë në skenë 6 premiera dhe 70 shfaqje nga të cilat përmendim: 37 koncerte brenda vendit, 2 koncerte jashtë vendit, 18 shfaqje në opera dhe 13 në balet të ndjekura nga 22,135 spektatorë gjithsej.

Ansambli Shtetëror ka dhënë 34 koncerte brenda vendit të ndjekura nga 40,550 spektatorë. Teatri Kombëtar për Fëmijë ka dhënë 69 shfaqje të ndjekura nga 6,870 spektatorë.

Muzeu Historik Kombëtar është vizituar nga 57,363 persona.

Kinema Millenium 1 dhe 2 kanë dhënë nga 37 premiera dhe 1,647 shfaqje.

Teatri i Estradës ka dhënë 3 premiera dhe 23 shfaqje të ndjekura nga 1,302 spektatorë.

Cirku i Tiranës “Ali Xhixha” ka dhënë 1 premierë dhe 52 shfaqje të ndjekura nga 4,466 spektatorë.

Në Tiranë ka gjithsej:

• 9 biblioteka një prej të cilave është Biblioteka Kombëtare

• 1 Muze Historik Kombëtar (i vizituar nga 57,363 persona gjatë vitit 2004)

• 5 Shtëpi muze dhe 57 monumente kulture

• 2 stadiume futbolli (të cilat i përkasin klubit futboll Tirana)

• 1 pallat sporti (i cili i përket klubit shumësporte Tirana)

• 6 terrene sportive (5 prej tyre i përkasin klubit shumësporte Partizani dhe 1 klubit shumësporte Tirana)

• 11 fusha futbolli (5 prej tyre i përkasin klubit futboll Partizani, 3 klubit futboll Tirana dhe 3 klubit sportiv Dinamo)

• 1 pishinë (e cila i përket klubit shumësporte Partizani)

• 3 poligone qitjeje (1 prej tyre i përket klubit shumësporte Partizani, 1 klubit shumësporte Tirana dhe 1 klubit Studenti)

• 12 palestra (8 prej tyre i përkasin klubit shumësporte Partizani, 2 klubit shumësporte Tirana, 1 klubit sportiv Dinamo dhe 1 klubit Studenti)

• 1 sallë shahu, ping-pongu, etj. (e cila i përket klubit shumësporte Partizani)


Turizmi


Sipas Ministrisë së Rregullimit të Territorit dhe Turizmit, në Tiranë janë 29 subjekte të liçensuara për ushtrim veprimtarie turistike si agjensi turistike udhëtimi dhe 13 subjekte të liçensura për ushtrim aktiviteti veprimtarie turistike akomoduese.


Disa nga muzetë dhe objektet për tu vizituar në Tiranë janë:

• Monumenti “Gjergj Kastrioti Skënderbeu” i vendosur në sheshin Skënderbej.

• Muzeu Historik Kombëtar

• Kalaja e Dorsit e cila gjendet në rrethinat e Pezës dhe i përket kulturës së hershme ilire.

• Kalaja e Petrelës e cila gjendet ne jug të Tiranës në të djathtë të rrugës kryesore Tiranë-Elbasan.

• Kalaja e Prezës e ndërtuar nga turqit pas vdekjes së Skënderbeut më 1468.

• Xhamia e Ethem Beut e ndërtuar në vitin 1789.

• Kulla e Sahatit e ndërtuar në vitin 1830.

• Ministritë të ndërtuara në vitin 1930 të cilat përfaqësojnë vlera të mëdha arkitektonike.

• Muzeu Arkeologjik

• Galeria e Arteve

• Ekspozita e Kulturës Popullore

• Parku i Madh i Tiranës me sipërfaqe 230 ha, i cili shtrihet në pjesën jugore të qytetit. Në qendër të tij gjendet Liqeni Artificial me sipërfaqe 55 ha.

Per me shume vizitoni http://www.tirana.gov.al