“Onufri”, më shumë hapësira për shqiptarët

Më shumë artistë shqiptarë për “Onufri 2005”. Nesër, në ambientet e Galerisë Kombëtare të Arteve, çelet edicioni i 12-të i konkursit ndërkombëtar të arteve figurative “Onufri”. Këtë herë ky konkurs vjen nën përkujdesjen e një gruaje, e kuratores Eleni Laperi, e cila përzgjodhi për këtë edicion temën “Lart e poshtë”, mbështetur në fjalët e shkrimtarit italian Umberto Eko. Dje, vetëm pak ditë pas shpalljes së organizimit të aktivitetit ( i cili u lëkund për mungesë fondesh) dhe kuratores së tij, u shpall lista e artistëve pjesëmarrës në këtë edicion. Janë gjithsej 23 artistë pjesëmarrës, mes të cilëve 15 janë shqiptarë. Disa syresh janë emra mjaft të njohur të pikturës shqiptare, si Ali Oseku, Gazmend Leka, Hasan Nallbani e Ardian Isufi, për të vazhduar me të tjerë emra në fushën e fotografisë, si Suela Qoshja, Rudina Memaga, Heldi Pema, e shumë të tjerë që paraqiten me video instalacione. Krahas artistëve shqiptarë, në “Onufri 2005” marrin pjesë artistë të huaj nga Suedia, Finlanda, Gjermania, Austria e Greqia, si Harri Palviranta, Knutte Wester, Claudia Maria Luenig, Fred Misik, Maria Paschalidou, Irini Linardaki, etj. Sipas kuratores Eleni Laperi, format artistike që vijnë në këtë aktivitet, janë nga më të ndryshmet. Nuk janë vënë limite, ndaj dhe në hapësirat ekspozuese do mund të shohim edhe pikturën, edhe videon, instalacionin, fotografinë, posterin etj. Të gjitha punët që paraqiten në këtë aktivitet, i janë nënshtruar konceptit kuratorial të titulluar “Lart e poshtë”. Sipas kuratores, duke qenë se bëhet fjalë për një temë, e cila mund të kuptohet në mënyra të ndryshme, hapësirat për tu shprehur janë edhe më të mëdha. Ndryshe nga herët e tjera, ky konkurs do shoqërohet edhe me një debat mes artistëve pjesëmarrës në “Onufri 2005”, mbi artin në Ballkan e në Evropë. Sipas zakonit, edhe këtë herë do të ketë çmime për paraqitjen më të mirë. Fituesi do të shpallet në datën 25 janar 2006, ndërsa ekspozita do të qëndrojë e hapur deri me datë 31 janar 2006. Një vit më parë, konkursi “Onufri” është drejtuar nga kuratori kosovar Erzen Shkololli, nën konceptin kuratorial të titulluar “Vende të spikatura”. Mes 26 artistëve pjesëmarrës nga vende të ndryshme të botës, çmimi i parë është fituar nga boshnjakja Sejla Kameric me punën e titulluar “Historia e shtëpisë së ëndrrave”.